خالد شكو

كلمة السيد حسن نصر الله لطلاب الحاسوب ونظم المعلومات

كيف فهم السادة الدكاترة كلمة السيد حسن نصر الله (ما بعد ما بعد حيفا ) في حرب لبنان

دكتور التنبؤ الاداري وقت سالنا عن موعد طباعة الكتاب الجديد رد علينا

ما بعد ما بعد الفحص

وحياة ما بعد ما بعد الفحص هي حياة مشابهة لحياة القبر مخصصة لتعذيب طلاب الحاسوب

وهي الفترة البسيطة لاعلان النتائج بعد الفحص التي تمتد بين الف و الفين عام

قال الاسبوع الماضي  اتخذ مجلس الجامعة قرار بطباعة الكتاب

دكتور المشرف عن جامعة حلب وحمص وقت سالنا عن موعد تشغيل الشوفاجات والتدفئة رد علينا

ما بعد ما بعد فادي

وفادي هو احد احلى الشباب الحماصنة واكثر واحد بيتحمل برد بالعالم وهو مبرمج يعيش تلات ايام بالتلاجة يعني بيموتوا الشباب كلون لحتى يبرد وهو مصر يموتوا  لفادي من البرد ولهلق صار رايحلنا نحنا الشوام شي ست شباب واربعة من درعا تحت التعذيب والبرد بالقاعة 26تحديدا

دكتور المسؤول عن تسليم الاجهزة بجامعة حمص وقت سالنا عن جهاز الاسقاط للسنة التالتة رد علينا

ما بعد ما بعد الفصل الثامن

يعني بحفلة التخرج ان شاء الله بيخلي التلاتة الاوائل يتصوروا قدام جهاز الاسقاط يلي مخبيينوا بالجامعة

دكتور المسؤول عن العملي بجامعة حمص وقت سالنا عن اجهزة الكمبيوتر مشان العملي مثل اشقائنا بحلب رد علينا

ما بعد ما بعد ادنكون

يعني بس طلاب حمص يشوفوا ادنيهون بشكل مباشر بيشوفوا هي الاجهزة

وقت سالنا الدكتور المسؤول عن برنامج الامتحانات

ما بعد ما بعد وزارة الصحة

وهاد مكان مثل مشفى الامراض النقسية والعصبية بيحطوا طلاب الحاسوب ليتعالجوا من برنامج الفحص ويلي بتحطوا مجموعة من كبار بياعين الخضار والفواكة على مستوى العالم بمشاركة واسعة لخبراء بيع الفول والاجبان

يعني بيختاروا اصعب الظروف مشان يلبكوا يلي عندون شغل او الموظفين او يلي مسافرين قدر الامكان  بالاجازات وبترتيب ايام المواد

ياريت من الشباب يلي بيعرفوا حدا من مسؤولين الجامعة يقولولون مشان التدفئة يااما الشباب الحماصنة والحلبية يجيبوا دفايات من بيوتون لانو والله ما عم نعرف شو عم يصير بقلب المحاضرة وشو عم يحكي الدكتور من كثر البرد والاسبوع الجاية ما بنعرف من بنفقد من الشباب لانو الوضع على كف عفريت ويبدو العفريت بلش يزقف

والله صرنا بين المحاضرة والمحاضرة نطلع نوقف بالشمس مشان ما نموت

و بيجوز يطلع مرض جديد اسمو انفلونزا الحاسوب ونظم الدجاج على كثر ما في برد بالجامعة وينبلى العالم فينا

اعصار عيشة يضرب جامعة حلب (نظم المعلومات )

لم تكتفي جامعة حلب بتحطيم الرقم القياسي تلو الأخر بل بدأت بابتكار أنواع جديدة و منفردة من الأرقام القياسية و نذكر منها على سبيل المثال لا الحصر من تلك الموسوعة :

• ابعد مسافة بين غرف التسجيل الجامعي ( والذي قد يكون عالميا ) : فهناك مسافة بين غرفة تدقيق المعلومات و غرفة تسجيل المواد لا تزيد عن 1.5 كيلو متر فقط أي بين المكتبة المركزية في جامعة حلب والى ما بعد كلية الهندسة لغرف التدقيق ومن ثم الذهاب ما يقارب المسافة نفسها بمكان اخر لدفع المبلغ المطلوب من الطالب ( الصندوق ) .

• نقل ما يقارب 3000-4000 طالب لإجراء الامتحان من حمص الى حلب بعد ان قام جميع هؤلاء الطلاب بالتسجيل على اساس تواجد دائم في حمص و الرقم ليس مفاجئ بالنسبة لانجازات جامعة حلب  خصوصا في ظل هذه الظروف الجوية  والمخاطر التي قد يتعرض لها الطلاب لا سمح الله

• الرقم الاخطر والتي سوف تحتفظ به جامعة حلب لنفسها طويلا و الذي يتجاوز افكار او حتى تخيل السيد غينس للارقام القياسية و الذي يتجاوز العالمية وربما الى ابعد من ذلك فقد اتخذت الجامعة قرارا بتغيير كتاب مادة الخوارزميات للسنة الثانية و هو لم يطبع حتى الان ونحن لا نبعد عن الامتحان سوى اسبوع واحد فقط علما ان الكتاب القديم يتالف من 368 صفحة + ملحق 40 صفحة اما الكتاب الجديد يتالف من حوالي 350 صفحة حسب دكتور المادة وهو لا يتوافق في المعلومات مع الكتاب القديم بأكثر من 20%

نحن كطلاب نظم معلومات (مسبق الدفع ) كنا نظن ان المسافات الكبيرة بين غرف التسجيل ما هي الا عمل قومي من الجامعة لتنشيط حركة التكاسي و السرافيس و الاكشاك (تجارة محلية ). اما نقل مركز الامتحان من حمص الى حلب ماهو الا عمل فعال في مجال تنشيط السياحة الداخلية و إطلاع ترفيهي للطلاب على ربوع بلادهم في أوقات الفراغ ( الامتحانات ) . اما بالنسبة لتعديل الكتاب في هذه الفترة رغم تاكيد الدكاترة ان الاسئلة منه حصريا فلم نجد له أي عذر فهل هو للسياحة الداخلية ام للتجارة المحلية.

ونحن كنا طالبنا على هذا الموقع بالذات قبل حوالي ثلاث اشهر لحل مشكلة الكتاب ولكن الجواب كما ترون جاء بالاستبدال قبل اسبوع من الامتحان و هو لم يطبع بعد.

ونحن الان لا نطالب مسئولي جامعة حلب بأي شيء لاننا نعلم انهم لم يفعلوا شيئا في الماضي و لن يفعلوا شيئا في المستقبل

الحمد لله حصلنا جزء من حقوقنا في فرع الحاسوب ونظم المعلومات العام 2022

يستلم وزير التعليم العالي الوزارة وهواحد خريجين طلاب الحاسوب

في ال 2/1/2022 من نفس العام لانو 1/1/2022 عطلة ويدخل طالب من فرع الحاسوب للتسجيل في احد دورات اللغة في الجامعة

ويقرا عبارة : الرجاء على جميع الطلاب الوقوف بانتظام …….. عدا طلاب فرع الحاسوب الدخول كيف ماشاؤا

طالب فرع الحاسوب يستشيط غضبا و يتوجه الى الموظف : كيف بتحطوا اسم الطالب العادي قبل اسمنا   (فرع الحاسوب). هدا التسيب ما عاد نخلص منوا

فيعتزر الموظف بعدما يعترف بذنبه و يغير اللوحة لتصبح :

الرجاء على جميع الطلاب فرع الحاسوب الدخول كيف ماشاؤا

عدا باقي الطلاب الوقوف بانتظام

وفي اليوم التالي يدخل طالب من فرع الحاسوب (ابو حميد ) الى المدينة الجامعية فيقرا عبارة :

الفلل الطابقية و التراسات مخصصة لطلاب فرع الحاسوب فقط….الاقبية  لباقي فئات الطلاب

يعصب طالب فرع الحاسوب و يطالب باخلاق الفرسان التى اعتدنا عليها و يقول لمدير المدينة الجامعية

شو هل الاستهتار بحقوق اخواننا الطلاب الباقين هناك الاسطحة فارغة احسن ما تنترك للقطط  خلي المساكين يستفيدوا

و طبعا الجواب من المدير: تكرم عينك توجيهات طلاب فرع الحاسوب تؤحذ بعين الاعتبار دائما

يوم الثلاثاء 5/1/2022 و هو منتصف الاسبوع لانو كلشي تغير…..الطالب ابو عبدو يلفت نظر الدكتور المحاضر الى بعض الامور والملاحظات و اهمها :

ضرورة اعادة بعض المحاضرات التي لم يفهمها زملاء ابو عبدو المحترم اللذبن كانوا على البحر وقت القاء المحاضرة و لم يستطيعوا فهمها من الملخص

و في اليوم التالي ياتي الرد الصاعق من الدكتور: والله لن اعيد المحاضرة اكثر من ثلاث مرات للطلاب و من لم يفهمها يجي لعندي على المكتب و انا بعيدها له و الضيافة لن تكون سوى شاي مع الكاتو نظرا لسوء حالتى المادية بسبب انخفاض رسم المادة الواحدة الى 182.3 ليرة للطلاب مما انعكس سلبا على رواتب الدكاترة بشكل عام .

و يسكت الزميل ابو عبدو عن الرد نتيجة تطاول الدكتور عن اعادة المحاضرات و يقول خليني احسن منو .

الزميلة ام السوس تطالب بلجنة تحقيق رسمية من جامعات القطر على نتيجة الامتحان لانها كتبت ب 88 علامة و جابت 86

وياتي الرد المخيب للامال من قسم الامتحانات :

سيدتي الطالبة ام السوس تحية طيبة و بعد الرجاء القبول بلجنة داخلية من الجامعة بالاضافة الى حقك الرسمي بحضور دكتورين ممن تثقين بهم لنزاهة اعادة التصليح .

و ترفض ام السوس هذا الاقتراح السخيف و تقول يلي حقوا معوا ما بيخاف من حدا

و لكن باخلاق العالية ترضى بعد فترة بهذه اللجنة حفاظا على كرامة الدكتور و عدم تشويه سمعته

و نحنا منا اليك الشكر الجزيل يا ام السوس لهذا التواضع اللذي ما عرفناه الا من ابناء و بنات فرع الحاسوب

كارثة انسانية باستشهاد زميل لنا في السنة الثانية في فرع الحاسوب ونظم المعلومات

وهذه هي وصيتة لابنه البكر

يا ابني

بوصيك اذا نزلت مادة الاحصاء مدري اديش كان رقمها 2.3 او 2.7 للمرحوم الدكتور اربعة او ستة سلندر (بنزين ودفع رباعي ) ما عاد اتذكر مظبوط لانو هاد الحكي صرلوا اكثر من 70 سنة يعني قبل ما خلفك .

برضاي عليك يا ابي اذا اجيت زرتني بالقبر و كانت النتيجة 49 لاتقلي ياها لانك بتزعلني بقبري وبغضب عليك وقدملي مباشرة اعتراض بركي ابنك بيلاحق المعاملة بعد ما انت تموت .

وعميل حسابك الدنيا دولاب اذا ما جبتلي علاماتي ابنك ما لح يجبلك علاماتك لما تموت (لانو هي الكلية مالها امان ).

وامانة شفلي النسبة اديش لانو طول عمري كنت احلم انجح بشي مادة كل العالم راسبين فيها بس الدكتور لحتى ما يعمل تمييز عنصري و لا حدا يجاكر حدا كان يرسب الكل ( على مبدا ماحدا احسن من حدا ) .

وادعي انك تعيش قد سيدنا نوح لانوا انا اتسرعت ودعيت الله يعطيني 120 سنة قد جارنا ابو ممدوح و تاري هيك عمر قصير ما بتحلم تشوف علاماتك واصلا مو مخصص لكلية مثل كليتنا ( مسافات طويلة )

وشفلي شو صار برفيقي ( حموده ) يلي مسكوا معوا الراشيتة لساتها بالمتحف و لا انسرقت لانو كان في شباب طايشين و عمرهون بالخمسينات من السنة الاولى حاولوا يسرقوها اكثر من مرة .

كنت احلم شوفك رجال وجوزك وشوف علاماتك قدامي قصدي ولادك تلعب قدامي بس انا ضوعت اخر 60 سنة من عمري وانا عم انتظر مواد السنة الثانية .

الله يرحم امك ماتت بالجلطة قبل ما تعرف نتيجتها تبع نظم المعلومات و كلو بسبب مزحة رفيقتها الله لا يرحمها لما قالتلها انك راسبة بنظم المعلومات مع انو امك ( الله بيشهد ) ماكانت مقدمه هي المادة لانو مازاد معنا مصاري هديك السنة لنشتريلها لامك المادة .

واذا عرفت انو صار دور تصليح ورقتي تبع الاقتصاد الكلي امانة توزع على روحي 20 ربطة خبز قدام الجامع الاموي و تقول انو ابي عرف مسالة بعشرين علامة ما حدا عرفها غيروا و مو موجوده بالكتاب بس للاسف ما عرف باقي الاسئلة .

واذا شفت ابنوا لجارنا ابو عمرو ( archer )  جاكروا يابابا و شوف حالك عليه و افتخر بابوك صحيح انا وياه فتنا بالحيط بكل المواد و صحيح هو جاب اكثر مني بعلامة بالرياضيات بس ابوك ما حطها واطيه وجاب اكثر منو بعلامتين بالمحاسبة  ( 22 ) و ابو عمرو (20) .

واذا جبلك سيرة برامج التطبيقية 1.0 قلوا بصوت عالي ( خراس ولك ) .

وقلوا صحيح ابي ما جاوب منيح بالبرامج التطبيقية 1.0 بس هي النتائج بعلم الغيب و هو شاف بالرؤيا ( بالمنام ) انو ما عاد تنزل النتائج ابدا و ( الله ما لح يزلنا قدامهون ) .

و اخيرا يابابا هاد الكيس الاسود على السقيفة مو زبالة هدول شوية ملخصات خوارزميات على اسئلة دورات (فضلة خير عمك حسام) صحيح مو محرزين شي 450 صفحة بس تركهون لابنك لانو الزمان غدار وبيجوز ما ينزل كتاب الخوارزميات على جيلو .

وجارتنا ام رامز ماتت و عينها فيهون المسكينة ماتت بغرفة الانعاش عفوا بقاعة الامتحان وهنن عم يعطوها حبة الضغط  القلم بايدها اليمين و السيرون بايدها الثانية .

واجى الله لا يسامحوا المراقب فجاه لعندها وقلها خلص الوقت آم عطتك عمرها من الرعبة .

فاكتبوا وصيتكم قبل ان ترحلوا لدنيا الحق

اسئلة نظم المعلومات كما قراتها

ترددت في كتابتها بس حبيت اعرف بالنهاية اذا كان الوضع طبيعي يعني انا لحالي او في حدا مثلي ولا انا ظروفي اثرت عليي

الحاسوب و نظم المعلومات

اسئلة  الامتحان

السنة الاولى / الدورة الثانية

للعام  1804    -      1805  قبل الميلاد

اكتب ما لا تعرفه عن  الاسئلة المستحيلة التالية :

1 – عرف ما يلي :                   0.003  لكل تعريف تعرفه واما مالا تعرفه 10 درجة

عدم اهمية هذا الكتاب في الحياة العملية – عدم مسايرته للتطور – الابتعاد عن الواقع –                سخافة المعلومات – القدرة على الحفظ – النسيان – الذاكرة ( للاشخاص الطبيعيين ) –

2 – ماهي ميزات و مساوئ كل شي خلقه الله من مجهريات وغير مجهريات واي شي بتعلق بأي شي

3 – ماهي خصائص لأي شيء نسيته وغير الله مابيخليك تتذكروا

المجموعة الثانية :

جاوب عن الاسئلة التالية و تعطى علامة الصفر عن ما يتجاوز الثلاث صفحات ( اذا معك راشيته طبعا )

1-      ماهي الفقرات التي لم تستطيع حفظها في الثلاث أبحاث الأولى و ان قمت بحفظها كلها فيكون السؤال ملغي

2 -  ماهي الاسئلة التي لم تتداخل في ذاكرتك ان وجدت

3 – الصفات التي يجب ان يتحلى بها من كتب هذه الاسئلة

ملاحظة : الرجاء عدم ادخال الكتب الى القاعة اثناء الفحص

الدكتور خالد